តើ​មន្ត្រី​ដែលមាន​ផ្ទះ​ធំ រថយន្ត​ទំនើប ជា​មន្ត្រី​ដែល​ពុករលួយ​ឬទេ ?

(អត្ថបទចុះ​ផ្សាយ​នៅ​ថ្ងៃ    27-11-2013, 8:40 pm)  |  ដោយ បាន សំអាង

នៅក្នុង​ប្រទេស​កម្ពុជា មន្ត្រីរាជការ​ដែលមាន​តំណែងធំៗ នៅក្នុង​ស្ថាប័នរដ្ឋ​ភាគច្រើន​គឺមាន ផ្ទះធំៗ សម្ភារៈប្រើប្រាស់ទំនើបៗ ដូចជា​ឡាន​ស៊េរី​ថ្មី​ជាដើម។ ប្រជាពលរដ្ឋ​សាមញ្ញ ពួកគាត់​តែងតែ​និយាយតៗគ្នា​ថា ច្បាស់​ជាម​ន្ត្រី​ទាំង​នោះបាន​ប្រព្រឹត្ត​នៅ​អំពើពុករលួយ កិបកេង​ទ្រព្យសម្បត្តិ​រដ្ឋ​ជាមិនខាន​នោះទេ ដោយ​ពួកគាត់​សំអាងថា បើទោះបីជា​មន្ត្រីជាន់ខ្ពស់​ប៉ុណ្ណា​ក៏ដោយ អ្នក​ដែល​ទទួលបាន​ប្រាក់ខែ​ខ្ពស់​ជាងគេ​នោះ យ៉ាង​ច្រើនជាង ២ ០០០ ដុល្លារ​តែប៉ុណ្ណោះ។ បើ​ប្រាក់ខែ​តែ​ប៉ុណ្ណេះ តើ​មន្ត្រីធំៗទាំងនោះ​បាន​លុយ​មកពីណា ដើម្បី​ទិញ​ផ្ទះ ទិញ​រថយន្តទំនើបៗជិះ​នោះទេ។
ពាក់ព័ន្ធ​នឹង​បញ្ហា​នេះ​ផងដែរ លោក ហុង សម្បត្តិ មេធាវី នៃ​មជ្ឈមណ្ឌល​តស៊ូ​មតិ និង​ប្រឹក្សា​យោបល់ (ALAC) នៃ​អង្គការ​តម្លាភាព​កម្ពុជា ក៏បាន​លើកឡើង​ដែរ​ថា លោក​ក៏​ធ្លាប់​បានទទួល​នូវ​ពាក្យបណ្ដឹង​ប្រភេទ​នេះដែរ ដោយ​អ្នក​ដែល​ទូរស័ព្ទ​មកប្ដឹង​នោះ គឺ​គ្រាន់តែ​បានឃើញ​មន្ត្រី​ម្នាក់​ទើបតែ​ឡើងកាន់តំណែង ជា​ប្រធាន​នាយកដ្ឋាន​សោះ ស្រាប់​តែមាន​លុយ​សាងសង់​ផ្ទះ​យ៉ាង​ធំ​ស្កឹមស្កៃ យ៉ាង​ឆាប់រហ័ស​យ៉ាង​ដូច្នេះ។

លោក​មេធាវី​រូបនេះ ក៏បាន​ធ្វើការ​ពន្យល់​ពី​ករណីនេះ​ផងដែរ​ថា៖«យើង​មិនអាច​និយាយថា ករណីនេះ​ជា​អំពើពុករលួយ​នោះទេ»។ លោក​បន្តថា ដើម្បី​អាច​ចាត់ទុកថា​វា​មន្ត្រី​នោះ​ពុករលួយ គឺ​គេ​ត្រូវការ​តាមដាន​មើល​ពី​ប្រវត្តិ​ការងារ​របស់គាត់ ពី​ប្រភព​ចំណូល​របស់គាត់ ថា​តើ​គាត់​មានទំនាស់​ផលប្រយោជន៍​នៅក្នុង​កន្លែង​ការងារ របស់គាត់​ដែរឬទេ?

លោក​ក៏បាន​បញ្ជាក់​ផងដែរ​ថា ចាប់ពី​ពេលដែល​មជ្ឈមណ្ឌល ALAC នេះ​បាន​បើក​នៅ​ថ្ងៃទី២០ ខែកញ្ញា​មក​នោះ ALAC ទទួលបាន​ករណី​បណ្ដឹង​ជាច្រើន​ពី​ប្រជាពលរដ្ឋ ហើយ​ភាគច្រើន​នៃ​បណ្ដឹង​ទាំងនោះ​គឺ​មកពី​តាម​បណ្ដា​ខេត្ត។បណ្ដឹង​ទាំងនោះ គឺ​ភាគច្រើន​កើត​នៅក្នុង ស្ថាប័ន ឬ មន្ទីរ នៅតាម​ខេត្ត​មួយចំនួន ដែលមាន​ដូចជា ករណី​កិបកេង​ប្រាក់ខែ កាត់លុយ ឬក៏​ស៊ីប្រាក់ខែ​របស់​បុគ្គលិក​ដែល​មានតែ​ឈ្មោះ និង​ករណី​ដែលមាន​មន្ត្រី​សុរិយោដី​មួយចំនួន ដែល​គ្មាន​សិទ្ធិ​ចេញ​លិខិត ឬ​ឯកសារ បែរជា​លួច​ចេញ​ឯកសារ ដើម្បី​យកប្រាក់​ពី​អ្នក​ដែល​ត្រូវការ​ឯកសារ​នោះ ជាដើម៕
Source : tmey tmey