បក្សប្រឆាំង​កំពុង​ពិចារណា​លើ​ទីតាំង​ធ្វើបាតុកម្ម​ចំនួន៣នៅ​សៀមរាប

(អត្ថបទចុះ​ផ្សាយ​នៅ​ថ្ងៃ    28-11-2013,  2:53 pm) |  ដោយ រ៉េន រតនៈ

 ទីតាំងសំខាន់ៗចំនួន៣ក្នុង​ខេត្តសៀមរាប រួមមាន​ទីមួយ ទីលាន​អង្គរ​ឃ្យុ​ង​យូ ទី២បរិវេណ​មុខ​ប្រាសាទ​អង្គរ និង​ទី៣ អាចជា​វត្ត​អារាម​ដែល​ស្ថិតក្នុង​ទីប្រជុំជន​ខេត្តសៀមរាប​នោះ  កំពុងស្ថិត​ក្នុងការ​ពិចារណា​នៅឡើយ ពី​សំណាក់​ថ្នាក់ដឹកនាំ​គណបក្ស​សង្គ្រោះ​ជាតិ ដើម្បី​រៀបចំ​មហា​បាតុកម្ម​នៅ​ថ្ងៃទី១០ ខែធ្នូ​ខាងមុខនេះ។

បើតាម​គណបក្សប្រឆាំង អាជ្ញាធរ​ខេត្តសៀមរាប បាន​ចង្អុល​ទីតាំង​នៃ​ទីលាន​អង្គរ​ព្យូ​ង​យូ​ង សម្រាប់​ការ​ប្រារព្ធ​មហា​បាតុកម្ម​របស់​គណបក្ស​សង្គ្រោះ​ជាតិ ប៉ុន្តែ​មន្ត្រីជាន់ខ្ពស់​គណបក្សប្រឆាំង​បាន​បញ្ជាក់ថា ទីតាំង​នោះ​មិន​អំណោយផល​ដល់​ការរៀបចំ​បាតុកម្ម​របស់ខ្លួន​ឡើយ។

ថ្លែងប្រាប់​គេហទំព័រថ្មីៗ លោក ឡុង រី​មន្ត្រីជាន់ខ្ពស់​គណបក្ស​ស​ង្គ្រោះ​ជាតិ បាន​ឲ្យ​ដឹងថា អាជ្ញាធរ​ខេត្តសៀមរាប​បានបង្ហាញ​ទីតាំង​អង្គរ​ព្យូ​ង​យូ​ង សម្រាប់​ការរៀបចំ​មហា​បាតុកម្ម​របស់​គណបក្ស​សង្គ្រោះ​ជាតិ។ បើតាម​មន្ត្រី​គណបក្សប្រឆាំង​រូបនេះ ទីតាំង​ដែល​សាលាខេត្ត​សៀមរាប​បង្ហាញ​ជូន​នោះ ស្ថិតនៅ​ឆ្ងាយ​ពី​ទី​រួម​ខេត្ត និង​ទីប្រជុំជន នឹង​គ្មាន​អំណោយផល​ល្អ​ឡើយ ដល់​ការរៀបចំ​មហា​បាតុកម្ម​របស់ខ្លួន។

លោក ឡុង រី ថ្លែង​ឲ្យ​ដឹងថា គណបក្ស​សង្គ្រោះ​ជាតិ​ទំនងជា​មិនអាច​រៀបចំ​មហា​បាតុកម្ម​នៅលើ​ទីតាំង​ដែល​ អាជ្ញាធរ​ខេត្តសៀមរាប​ចង្អុលបង្ហាញ​នោះបានទេ ហើយ​ថា គណបក្ស​សង្គ្រោះ​ជាតិ​កំពុង​ពិចារណា​លើ​ទីតាំង​ចំនួន​ពីរ​បន្ថែមទៀត គឺ​ទីលាន​មុខ​ប្រាសាទ​អង្គរ និង​នៅក្នុង​ទី​អារាម​ណាមួយ​នៃ​ទី​រួម​ខេត្តសៀមរាប ដែលជា​តំបន់​ទីប្រជុំជន៕

source : http://thmeythmey.com/index.php?page=detail&ctype=article&id=10001&lg=kh