ករណីរណីថ្មី៖ ធ្លាក់ពីលើចុងត្នោតកំពស់ជាង១០ម៉ែត្រ សំណាងល្អបានកូនដើមស្នាយ ជួយទ្រពីក្រោម ទើបរងរបួសមធ្យម
កំពង់ឆ្នាំង៖ បុរសម្នាក់បានរងរបួសជាមធ្យមដោយបានដាច់ខ្សែលួសចងស្នួរធ្លាក់ពីលើចុងត្នោតកំពស់ជាង១០ម៉ែត្រមកដី តែសំណាងល្អបានកូនដើមស្នាយជួយទ្រពីក្រោម គ្រោះថ្នាក់នេះបានកើតឡើងនៅវេលាម៉ោង៩និង៣០នាទីព្រឹកថ្ងៃទី០៤ ខែធ្នូ ឆ្នាំ២០១៣ នៅក្នុងភូមិចំការតាម៉ៅ ឃុំស្រែថ្មី ស្រុករលាប្អៀរ ករណីនេះគឺជាគ្រោះថ្នាក់លើកទី២ហើយក្នុង សប្តាហ៍នេះ។
ជនរងគ្រោះមានឈ្មោះ ម៉ក់ ម៉ុន អាយុ៤១ឆ្នាំ មានកូនម្នាក់ជាបុរសពោះម៉ាយ មានមុខរបរឡើងត្នោតនិងលក់ទឹកត្នោតជូរ រស់នៅក្នុងភូមិឃុំកើតហេតុខាងលើ បាននិយាយអោយដឹងថា៖រៀងរាល់ថ្ងៃគាត់ឡើងត្នោតចំនួន១៨ដើមទាំងព្រឹកទាំងល្ងាច ដើម្បីដាក់ទឹកត្នោតជូរយកមកលក់នៅផ្ទះ គាត់ប្រកបមុខរបរឡើងត្នោតបែបនេះ៤ឆ្នាំមកហើយ។
នៅព្រឹកថ្ងៃទី៤ ខែធ្នូ គាត់បានឡើងត្នោតដូចសព្វដង ចៃដន្យពេលឡើងដោះទឹកត្នោតជូរលើចុងត្នោតដែលមានចងស្នួរភ្ជាប់ទៅដើមត្នោតមួយដើមទៀតកំពស់ជាង១០ម៉ែត្រ ខណៈនោះក៍បានដាច់ខ្សែលួសចំណងស្នួរធ្លាក់ ហើយគាត់ក៍បានតោងស្លឹកត្នោត តែដោយតោងមិនជាប់ក៍ធ្លាក់មកដី សំណាងល្អបានកូនដើមស្នាយមួយដើមនៅពីក្រោមជួយទ្រ ទើបបណ្តាលអោយរូបគាត់រងរបួសដៃជើងនិងចង្កេះជាមធ្យម។ ក្រោយពេលកើតហេតុអ្នកស្រុកក្នុងភូមិក៍បានជួយដឹកបញ្ជូនរូបគាត់មកកាន់មន្ទីរពេទ្យបង្អែកខេត្តដើម្បីសង្គ្រោះព្យាបាល។
បុរសរងគ្រោះក៍បាននិយាយអោយដឹងទៀតថា៖កាលពី២ឆ្នាំមុនរូបគាត់ក៍បានធ្លាក់ពីលើចុងត្នោតម្តងរួចមកហើយ ដោយសារតែដាច់ខ្សែលួសបង្អោងត្នោត។ករណីគ្រោះថ្នាក់ខាងលើត្រូវបានអ្នកស្រុកនិយាយថា បណ្តាលមកពីបុរសរងគ្រោះមានការធ្វេសប្រហែសមិនផ្លាស់ប្តូរចំណងខ្សែលួសដែលច្រេះចាប់រយៈពេលជាងមួយឆ្នាំមកហើយ។
គួរបញ្ជាក់ថា៖កាលពីល្ងាចថ្ងៃទី០៣ ខែធ្នូ ក៏មានបុរសម្នាក់បានស៊ីឈ្នួលឡើងកាប់ ស្លឹកត្នោត ហើយបានធ្លាក់ពីលើចុងត្នោតរងរបួសបាក់ចង្កេះ២កំណាត់ធ្ងន់ធ្ងរ ហើយត្រូវគេបញ្ជូននិងកំពុងធ្វើការសង្គ្រោះនៅមន្ទីរពេទ្យរុស្សីក្រុងភ្នំពេញ៕ ដោយ រិទ្ធិ ជ័យ
Tag: ដើមចេកខ្មែរ , khmer banana news
Source : khmerangkor-news.com
សំគាល:
0 comments: