កំពង់ស្ពឺៈ បន្ទាប់ពីទទួលមរណភាពកាលពីព្រឹកថ្ងៃអាទិត្យ ទី១ ធ្នូកន្លងមកនេះ ម្តាយរបស់តារាចម្រៀង អ៊ីវ៉ា ត្រូវបានធ្វើពិធីបញ្ចុះជាផ្លូវការហើយកាលពីព្រឹកម្សិលមិញ ក្រោមការទួញសោក យំយែកយ៉ាងខ្លាំងពីនាង អ៊ីវ៉ា ជាកូន និងសមាជិកគ្រួសារ ដោយមានការចូលរួមពិធីយ៉ាងច្រើនពីសំណាក់អ្នកសិល្បៈ និងអ្នកជិតខាង។
ម្តាយរបស់តារាចម្រៀងវ័យក្មេងរបស់សាន់ដេ នាង អ៊ីវ៉ា មានឈ្មោះថា អ្នកស្រី ភួង សុខា បានទទួលមរណភាពនៅអាយុ៤២ឆ្នាំទាំងមិននឹកស្មានដល់ដោយរោគាពាធ កាលពីព្រឹកថ្ងៃអាទិត្យ ទី១ ធ្នូ ឆ្នាំ២០១៣ វេលាម៉ោង៦ និង២នាទី ដែលធ្វើឲ្យតារាចម្រៀងរូបនេះ ក្រុមគ្រួសារ និងមិត្តភក្តិក្នុងសិល្បៈទួញសោកអាល័យយ៉ាងខ្លាំង។
លោក អ៊ូ ចន្ថា ដែលជាឪពុកបង្កើតរបស់តារាចម្រៀងសាន់ដេនាង អ៊ីវ៉ា និងត្រូវជាស្វាមីនៃសពបានមានប្រសាសន៍ថា អ្នកស្រី ភួង សុខា បានធ្លាក់ខ្លួនឈឺអស់រយៈពេលប្រមាណជា៧ទៅ៨ខែហើយ មុននឹងស្លាប់នោះ។ ពិធីបុណ្យសពត្រូវបានរៀបចំនៅភូមិវល្លិស ឃុំវល្លិស ស្រុកសំរោងទង ខេត្តកំពង់ស្ពឺ ហើយពិធីបុណ្យនេះត្រូវបានរៀបចំចប់សព្វគ្រប់ហើយកាលព្រឹកថ្ងៃទី ៤ ធ្នូ ២០១៣ ដោយធ្វើពិធីដង្ហែទៅបញ្ចុះនៅវត្តវល្លិស កាលពីម៉ោង៧ព្រឹកតែម្តង។
ការទទួលមរណភាពរបស់អ្នកស្រី ភូង សុខា ម្តាយរបស់ អ៊ីវ៉ា គឺជាការបាត់បង់សេចក្តីសុខ និងភាពកក់ក្តៅដ៏ធំមួយនៅក្នុងគ្រួសាររបស់តារាចម្រៀងរូបនេះ ខណៈដែលកន្លងមក ទាំងអ្នករស់នៅក្នុងសិល្បៈ និងក្រៅសិល្បៈបានដឹងយ៉ាងច្បាស់ថា អ្នកស្រីតែងចំណាយពេលយ៉ាងច្រើនដើម្បីដើរតាមថែ អ៊ីវ៉ា ស្ទើរគ្រប់ពេល ទាំងការច្រៀងនៅតាមខេត្ត និងនៅភ្នំពេញ ហើយនៅពេលមានរឿងអ្វីមួយកើតឡើងចំពោះ អ៊ីវ៉ា អ្នកស្រីតែងចេញមុខដើម្បីប្រឈមនឹងការពិតជានិច្ច។
ប៉ុន្តែចាប់ពីពេលនេះទៅ អ៊ីវ៉ា ហាក់ដូចជារងាជាងមុន ខណៈទៅណាមកណាតែម្នាក់ឯង ឬក៏ប្តូរដៃគូដើរនោះ។ មុន នេះគេបានដឹងថា តារាចម្រៀងនាង សុខ ពិសី គឺជាតារាកំព្រាម្តាយម្នាក់គត់នៅសាន់ដេ ហើយពេលនេះ អ៊ីវ៉ា ជាមនុស្សទី២ តែយ៉ាងណា គេបានដឹងថា អ៊ីវ៉ា ហាក់មិនសូវមានវិប្បដិសារីធ្ងន់ធ្ងរដូច សុខ ពិសី ឡើយ ខណៈម្តាយ អ៊ីវ៉ា ស្លាប់ដោយរោគាពាធ រីឯម្តាយ សុខ ពិសី ស្លាប់ដោយគ្រោះថ្នាក់ចរាចរណ៍ដែលរូបនាងជាអ្នកបើកបរដោយផ្ទាល់ នោះ។
តាមប្រភពពីសាច់ញាតិរបស់តារាចម្រៀងរូបនេះ បានឲ្យដឹងថា អ៊ីវ៉ា នឹងមិនទាន់ត្រឡប់មកកាន់សង្វៀនសិល្បៈភ្លាមៗបានទេ នាងនឹងត្រូវចំណាយពេលយូរគួរសមដើម្បីសម្រួលអារម្មណ៍មុននឹងឡើង ឆាកច្រៀងរាំ បញ្ចេញស្នាមញញឹម និងសាច់ខ្ចីលើឆាកនោះ។
ទស្សនិកជនមានការបារម្ភថា អ៊ីវ៉ា អាចនឹងធ្លាក់ប្រជាប្រិយភាពបន្តិច ខណៈដែលអារម្មណ៍របស់នាងនៅតែសៅហ្មងនឹងការស្លាប់ម្តាយនោះ តែយ៉ាងណាផលិតកម្មបញ្ជាក់ថា អ៊ីវ៉ា នឹងអាចបំពេញការងារបានល្អដូចមុននៅពេលនាងវិលវិញ។
ក្នុង អារម្មណ៍ក្តុកក្តួល និងសោកសៅជាពន់ពេកលោក ឡាយ សុខចំរើន ប្រធានគ្រប់គ្រងទូទៅរបស់ផលិតកម្មសាន់ដេ បានឲ្យដឹងថា រូបលោក រួមនឹងតារាចម្រៀងជាច្រើនរូបទៀត បានទៅចូលរួមរំលែកទុក្ខ គោរពវិញ្ញាណក្ខន្ធនៃសពនិងបានចូលរួមពិធីបញ្ចុះសពជាចុងក្រោយ កាលពីម្សិលមិញ។
លោកបានបញ្ជាក់ថា លោកមានអារម្មណ៍សោកស្ដាយជាពន់ពេក ខណៈដែលតារាចម្រៀង អ៊ីវ៉ា បានបាត់បង់ម្ដាយជាទីស្រឡាញ់គ្មានថ្ងៃត្រឡប់បែបនេះ ហើយរូបលោក និងតារាចម្រៀងទាំងអស់សូមជួយចែករំលែកទុក្ខដ៏ធំនោះផងដែរ៕
សំគាល:
0 comments: