ភ្នំពេញ: លោក កឹម សុខា អនុប្រធានគណបក្សសង្គ្រោះជាតិ ត្រូវបានទទួលការគំរាមសម្លាប់ ដោយគ្រាប់កាំភ្លើងចំនួន ៧គ្រាប់ និងធ្វើការប្រមាថដោយពាក្យសំដីពីសំណាក់អ្នកលេងហ្វេសប៊ុក ដែលមានឋានៈជាមេប៉ូលិស កាលពីព្រឹកថ្ងៃទី៤ ខែធ្នូ ឆ្នាំ២០១៣។
គណបក្សសង្គ្រោះជាតិ បានហៅការគំរាមសម្លាប់នេះ គឺជាការប្រមាថ និងជារឿងមួយមិនល្អ ក្នុងការសម្លុតគំរាមកំហែង។ ក្រុមអ្នកលេងហ្វេសប៊ុកជាច្រើន បានសម្តែងការភ្ញាក់ផ្អើលយ៉ាងខ្លាំង នៅពេលដែលឃើញអ្នកលេងហ្វេសប៊ុកដូចជាគ្នា បានធ្វើការគំរាមសម្លាប់លោកកឹម សុខា ដោយគ្រាប់កាំភ្លើង និងការញុះញង់ឲ្យប្រជាពលរដ្ឋប្រើអំពើហិង្សាទៅលើលោកកឹម សុខា ថែមទៀតផង។ ការគំរាមនេះ គឺខណៈពេលដែលលោកកឹម សុខា គ្រោងនឹងវិលត្រឡប់មកពីបំពេញទស្សនកិច្ចពីសហរដ្ឋអាមេរិក មកកម្ពុជាវិញនៅប៉ុន្មានថ្ងៃខាងមុខនេះ ដើម្បីមកដឹកនាំធ្វើបាតុកម្មនៅភ្នំពេញ និងខេត្តសៀមរាប។ នៅក្នុងគណនីហ្វេសប៊ុកឈ្មោះ ផែង វណ្ណៈ ដែលត្រូវបានគេឃើញដាក់រូបគណនីហ្វេសប៊ុកនោះ គឺជាមនុស្សដែលមានតួនាទីជានាយរងការិយាល័យនគរបាលព្រហ្មទណ្ឌកំរិតស្រាល នៅស្នងការដ្ឋាននគរបាលរាជធានីភ្នំពេញ ហើយឈ្មោះបុគ្គលរូបគណនីហ្វេសប៊ុក ដូចនឹងឈ្មោះហ្វេសប៊ុក ផែង វណ្ណៈ។ នៅក្នុងគណនីហ្វេសប៊ុកឈ្មោះ ផែង វណ្ណៈ ត្រូវបានមើលឃើញថា មានការបង្ហោះពាក្យសំដី និងរូបភាពកាំភ្លើងខ្លី ជាមួយនិងគ្រាប់កាំភ្លើងចំនួន៧គ្រាប់ គំរាមបាញ់ទៅលើលោកកឹម សុខា អនុប្រធានគណបក្សសង្គ្រោះជាតិ។ គណនីហ្វេសប៊ុកឈ្មោះ ផែង វណ្ណៈ បានសរសេរឲ្យឃើញថា “ទុក៧គ្រាប់ឲ្យកឹម សុខា គ្រាប់ទី១ បាញ់យកដៃឆ្វេង គ្រាប់ទី២បាញ់យកដៃស្តាំ គ្រាប់ទី៣ បាញ់យកជើងឆ្វេង គ្រាប់ទី៤ បាញ់យកជើងស្តាំ គ្រាប់ទី៥បាញ់ពោះ គ្រាប់ទី៦ បាញ់យកបេះដូង និងគ្រាប់ទី៧ បាញ់ឲ្យចំក្បាលកឹម សុខា!!!” ជាមួយគ្នានោះក៍មានការបង្ហោះរូបលោកកឹម សុខា ជាមួយនិងពាក្យសំដីញុះញង់ប្រជាពលរដ្ឋឲ្យប្រើអំពើហិង្សាទៅលើលោកកឹម សុខា ថែមទៀតផង។
ចំណែកលោកផែង វណ្ណៈ នាយរងការិយាល័យនគរបាលព្រហ្មទណ្ឌកំរិតស្រាល នៃស្នងការដ្ឋាននគរបាលរាជធានីភ្នំពេញ បានដិសេធថា លោកមិនបានទៅធ្វើការគំរាមបាញ់សម្លាប់លោកកឹម សុខា នោះទេ ហើយមានអ្នកយករូបកាត់ត ដើម្បីបរិហាកេរ្តិ៍ ហើយលោកនឹងរៀបចំប្តឹងអ្នកណាដែលបានធ្វើដូច្នេះ។
លោកផែង វណ្ណៈ បានធ្វើការបកស្រាយថា “ខ្ញុំអត់ដឹងផង ខ្ញុំអត់មានផូសអីផង ខ្ញុំដាក់ ថាខ្ញុំដាក់រកភស្តុតាង រកភស្តុតាងមកពីណា ថាខ្ញុំដាក់ យករូបកាត់តមកដាក់គេ បើចង់យករឿងនឹងទៅផ្សាយ ផ្សាយទៅ ពីព្រោះខ្ញុំបដិសេធ ខ្ញុំអត់មានទៅគំរាមបាញ់គាត់ទេ”។
លោកបានបញ្ជាក់ថា ចំពោះរឿងហ្វេសប៊ុក អ្នកណាកាត់តរូបដាក់ក្នុងគណនីហ្វេសប៊ុករបស់លោក។ លោកក៏រៀបចំប្តឹងអ្នកដែលបរិហាកេរ្តិ៍លោកដែរ។
រីឯលោក យ៉ែម បុញ្ញឫទ្ធិ អ្នកនាំពាក្យគណបក្សសង្គ្រោះជាតិ បានមានប្រសាសន៍ថា នេះជាការគំរាមកំហែងនិងជាការប្រមាណមកលើរូបលោកកឹម សុខា អនុប្រធានគណបក្សសង្គ្រោះជាតិ។
លោកបានបញ្ជាក់ថា “ពាក្យពេជន៍ទាំងអស់នេះ វាជាការប្រមាថមួយ និងជារឿងមួយមិនល្អ ហើយការដោយប្រយោលក្នុងការសម្លុតគំរាមកំហែងទាំងប៉ុន្មាន”។ ក៍ប៉ុន្តែលោកកឹម សុខា ធ្លាប់បានមានប្រសាសន៍ហើយសម្លុតមិនខ្លាចទិញមិនលក់ និងខិតខំដោះស្រាយបញ្ហាសង្គមជាតិ។
អ្នកនាំពាក្យគណបក្សសង្គ្រោះជាតិ ក៍បានធ្វើការអំពាវនាវសូមឲ្យយុវជន ឬក៍អ្នកដែលលេងហ្វេសប៊ុកចៀសវាងការប្រើពាក្យពេជន៍អសុរោះ អសីលធម៌ ការគំរាមកំហែង និងប្រមាថទាំងប៉ុន្មានវាធ្វើឲ្យប៉ះពាល់ដល់កិត្តិយសរបស់ជាតិ។
ទាក់ទងការគំរាមកំហែងសម្លាប់ទៅលើលោកកឹម សុខា មេដឹកនាំគណបក្សសង្គ្រោះជាតិ តាមរយៈហ្វេសប៊ុក ឈ្មោះ ផែង វណ្ណៈ នោះ គឺនៅរសៀលថ្ងៃទី៤ធ្នូ គេឃើញហ្វេសប៊ុកនោះ បានលុបចោលនូវរាល់ពាក្យព្រមាន និងសកម្មភាព រូបថតនានា ពាក់ព័ន្ធនឹងលោក កឹមសុខា អស់រលីង៕
សំគាល:
0 comments: